الفرق بين الحرمان البيئي واضطراب طيف التوحد

 السلام عليكم ورحمة الله وبركاته 

سوف نناقش العديد من الأسئلة التي كثيرا ما تسألها الأمهات حول أطفالها في هذا الموضوع 


أولا : ما الفرق بين الحرمان البيئي واضطراب طيف التوحد ؟

في البداية لازم نوضح باختصار ايه هو الحرمان البيئي وايه هو اضطراب طيف التوحد 

بالنسبة للحرمان البيئي : الحرمان البيئي سبب من أسباب تأخر الكلام عند الأطفال لكن مفيش تشخيص اسمه الحرمان البيئي هو سبب للتأخر 

 احنا دايما بنقول ان الطفل صفحة بيضا مين 

- مين اللي بيسطرها ؟ 

الأب و الأم و البيئة المحيطة.

طيب لو الأب و الأم منشغلين عن الطفل او مبيتكلموش مع الطفل كويس او لو الطفل ده مبيتعاملش مع أطفال تانيه او مبيتفاعلش مع أطفال تانية هتلاقي ان هو متأخر كتير في الكلام وهنلاقي نطقة متأخر معانا فبالتالي لازم نلاحظ البيئة المحيطة، أغلب الأسر المغتربه بيتكون عندها المشكلة دي او لو الأم مشغولة أغلب الوقت او مش فاضية للطفل والأب في شغله طول اليوم فا ايه العمل ؟ فا هي بتقعد الطفل طول اليوم قدام التلفزيون وتسيبه مع الموبيل او التابلت او التلفزيون. فهنا بنلاقي الطفل متأثر بالشاشات اللي بيستخدمها وعمل بوتقه حول نفسه ومبقاش متفاعل مع البيئة المحيطه ولا حاسس باللي حوالية هو كل تركيزه في الموبيل او التابلت فقط  ومبيكتسبش اي حاجه من اللي حوالية.

السبب التاني لتأخر الكلام عند الأطفال والمتعلق بسؤالنا واللي أصبح منتشر جدا جدا وعاوزين نسلط الضوء عليه وهو اضطراب طيف التوحد Autism

موضوع التوحد زمان كان نادر جدا وكان ممكن يحصل مره كل مائة الف طفل لكن أخر احصائية بتقول ان التوحد دلوقتي نسبته واحدر لكل سته وخمسون طفل يعني معني الكلام ان كل فصل دراسي فيه طفل شُخص باضطراب طيف التوحد، فا الموضوع اصبح منتشر بقوة 

طيب ايه معني الكلام ؟ 

معني الكلام ان انا لازم يكون عندي وعي اكون عارف ايه هو اضطراب طيف التوحد ؟ طيب ايه أعراضه أو ايه هي السمات بتاعته او ازاي اقدر اتعرف عليها بدري او انا ابني عندي سمات معينه اعمل ايه اتصرف ازاي  وابدا التدخل المبكر بتاعي امتي وازاي ؟ اروح لطبيب تخصصه ايه ؟ اروح مركز تخاطب ولا لاء ؟ كل ده لازم يكون عندي وعي بيه.

زي ماحنا عارفين او زي ما وضحنا في موضوع سابق عن  اضطراب طيف التوحد أن طفل اضطراب طيف التوحد عنده عدة مشاكل منها : 

قصور واضح في التواصل البصري ( تيجي تكلمه ميبصش ف عينك او يجي يكلمك ميبصش ف عينك )

قصور واضح في التفاعل الاجتماعي ( مبيتفاعلش مع حد ) 

- عدم التواصل اللغوي ( قصور في التواصل اللغوي ) مبيتكلمش خالص او ميعرفش يعبر عن احتياجاته او مشاعره.

- قصور في التواصل الاجتماعي ( عدم القدرة علي التواصل الاجتماعي )

- مبيتفاعلش مع الأب او الأم او الأخوه أو بيتفاعل تفاعل ضعيف جدا

***  ازاي افرق بين الحرمان البيئي واضطراب طيف التوحد ؟

لو عندي طفل حرمان بيئي فا هو مبيتكلمش ولو عندي طفل اضطراب طيف التوحد فهو برضو مبيتكلمش انا كأب او أم في البيت ازاي اعرف ابني مشكلته ايه او اعرف ازاي هو طفل حرمان بيئي ولا طفل اضطراب طيف التوحد ؟ 

 في البداية لازم نوضح ان في فروق أساسية بين الحرمان البيئي واضطراب طيف التوحد هنبدأ نسلط عليها الضوء :

- اول حاجه هي التواصل البصري : ان انا لما اجي اتكلم مع الطفل اللي قدامي ده المفروض اني ببص ف عينه فا هو بيبص ف عيني بعد كده ببدأ اعبرله عن اللي انا عاوزه فا طفل الحرمان البيئي بيتواصل بصرايا كويس جدا هو بس مبيتكلمش 

لكن طفل التوحد مستحيل او صعب جدا انه يتواصل معاك بصريا هو ممكن يبص ب طرف عينه او نظره جانبيه مش اكتر.

- تاني نقطة وهي التفاعل مع البيئة المحيطة : انا هجيب الطفل اللي عنده تأخر في الكلام سببه حرمان بيئي او اضطراب طيف التوحد وابدأ ادخله مع اطفال تانيه واشوف هيتصرف ازاي او لو في حضانه هيتصرف ازاي، طفل الحرمان البيئي بيتفاعل كويس جدا هو مبيتكلمش او مبيعرفش يعبر لكن لو وسط اطفال هيتفاعل كويس جدا هيبدا يلعب هيضرب هيتضرب هيتعامل مع الاطفال ويتفاعل معاهم ويعمل شقاوة ويتعامل بصورة طبيعية لكن طفل اضطراب طيف التوحد لا طبعا مبيعملش كده بنلاقي انه له العاب معينه خاصة بيه وطريقته الخاصو ول في اطفال مبيروحش ناحيتهم ولا بيتفاعل معاهم ولو راح ناحيتهم برضو مش هيتفاعل معاهم 

- التفاعل في البيت مع الأب و الأم : مفيش تفاعل خالص في البيت مع الأب و الأم بالنسبة لطفل اضطراب طيف التوحد لكن طفل الحرمان البيئي بيتفاعل كويس لو اديتله اوامر بسيطه بينفذها تلاعبه يضحكلك ويروح ويجي معاك ويتفاعل بشكل طبيعي جدا جدا وعنده فهم للكلام المسموع من الاب والام لكن هو مبيتكلمش 

- الطفل اللي عنده حرمان بيئي او اضطراب طيف التوحد لو عاوز حاجه هيعمل ايه ؟ 

طفل الحرمان البيئي هلاقي انه لما بيعوز حاجه بيشاور علي الحاجه دي فابالتالي انت بتعرف هو عاوز ايه عن طريق الاشارة او انه يشاور عالحاجه اللي هو عاوزها والاشاره بتتبر علامه للنضج الاجتماعي يعني مؤشر كويس لكن طفل التوحد بلاقي انه مبيعملش كده هلاقي انه لو عاوز حاجه بيبدأ يعيط ويصرخ ويدبدب في الارض لحد مانت تفضل تفكر هو عاوز ايه وتجيبهوله فا  يبدا يسكت او طفل تاني الاقي انه بياخد ايدك ويروح بيك لحد الحاجه اللي هو عاوزها او المكان اللي هو عاوز منه حاجه فا دي نقطة هامه جدا للتفرقة بين الحرمان البيئي واضطراب طيف التوحد.

- نقطة تانيه وهي نقطة الكلام : طفل الحرمان البيئي بلاقي انه ممكن يتكلم كلمتين او ثلاث كلمات والأهم انه بيكون قاصد الكلمة اللي بيقولها يعني بيقول ماما وهو فعلا محتاج مامته او بينادي مامته او بيقول بابا وهو عاوز باباه يجيله او يلب معاه او يروحله وهكذا، لكن طفل اضطراب طيف التوحد غالبا مبيكونش بيتكلم ولو اتكلم مبيكونش قاصد الكلمة اللي بيقولها يعني يقول ماما وهو ميقصدش مامته او م محتاج مامته او يقول باباه وباباه مش موجود اصلا يعني مبيكونش يقصد الكلام اللي بيقوله .

- نقطة تانيه مهمه جدا : وهي الانتباه للاسم : طفل الحرمان البيئي لما اناديه ب اسمه بلاقي انه بينتبه او يبصلي او يجيلي معني كده انه سمع اسمه ومنتبه ليا او باصص ليا او بيعبر عن سماعه لاسمه بالالتقاء البصري ده.

لكن طفل اضطراب طيف التوحد مهما ناديته ب اسمه هو مبينتبهش ولا بيبصلك ولا يجيلك تناديه مره واتنين وتلاته وعشره ولا  يبصلك ولا اي حاجه ولا في اي استجابة ولا في ي تفاعل يدل علي انه سامع اسمه 

فانا هبدأ اشوف طفلي بقي ابني مثلا التفاعل بتاعه مع الاطفال كويس بيلعب وبيتفاعل مع الاب والام و عارف اسمه لما بناديه بينتبه او يبجيلي ولما بيجي يعبر او لما بيحتاج حاجه بيشاور عليها وبلاقي انه بيقدر او بيتواصل معانا بصريا بشكل جيد يبقي انا كده طفلي متأخر بسبب الحرمان البيئي.

طيب لو انا اتأكدت ان طفي متأخر لغويا بسبب الحرمان البيئي ايه اللي ممكن اعمله او ازاي اقدر اساعده بطرق بسيطة وسهله وفعاله ؟ 

* اول حاجه لازم الاب والام يبذلوا مجهود مع الطفل بمعني ان الاب والام يبدأوا يتفاعلوا معاه ويتكلموا معاه ويتواصلوا معاه لكن مسيبش الطفل يشاور وكل ما يشاور علي حاجه اجيبهاله لا انا لازم اخليه يحاول ينطق اسم الحاجه اللي هو محتاجها لو بيشاور علي تفاحه انا لازم احاول اخليه ينطق اسمها افضل اقول اسمها كتير قدامه وافضل اكرر واعيد وازيد 

* تاني حاجه لازم ابدأ اقلل من وسائل التواصل الاجتماعي اقلل من الموبيل والتابلت والكمبيوتر والتلفزيون لانه لما بيستخدم الحاجات دي بيعمل بوتقه علي نفسه ومبيتفاعلش معايا ولا بيكتسب مني اي شيء ولا هيتفاعل ولا هيستجيب لما اجي اشتغل معاه ولا هيتفاعل مع البيئة المحيطة بيه.

لازم احاول اخليه يتفاعل مع اطفال تانيين مسيبش الطفل محبوس ف البيت طول الوقت وميشوفش اطفال ده غلط جدا لازم اخلي الطفل يشوف اطفال ويتفاعل ويلعب معاهم ويتواصل معاهم وان امكن اوديه حضانه مع اطفال في نفس سنه فيبدأ يتفاعل او يحاول يتكلم معاهم او يقلد كلامهم.

لكن طفل اضطراب طيف التوحد بياخد اتجاه تاني خالص في التعامل والشغل معاه وتأهيله وطبعا التدخل المبكر بيفرق كتير جدا جدا مع اطفال اضطراب طيف التوحد يعني لازم ابدأ معاه بعد التشخيص مباشرة لكن لو سيبته لحد ما بقي عمره ثلاث او اربع سنوات وبعد كده ابدأ اشتغل هيبقي الوضع اصعب بكتير جدا 

انا لازم احاول اشتغل واطور طفلي واشتغل علي تأهيله بدري ومضيعش عليه فرصة انه يتحسن ويتفاعل ويتطور ويتكلم ويتعلم ويكتسب طرف للتواصل قبل ما يوصل سن المدرسة علشان احاول ادخله مدرسة عادية فا ابدا اشتغل معاه عالتواصل البصري والتفاعل الاجتماعي وانه يتفاعل مع الاطفال والكبار ويبدأ يتعمل ويتعامل ويتفاعل ومينفعش اقول هوديه مركز تخاطب وخلاص كده اغلب الامهات او امهات كتير اطفالهم شُخصوا باضطراب طيف التوحد بنلاحظ انهم بيعتمدوا عالجلسات اعتماد كلي واكن الأب والأم ملهمش اي دور وده غلط كبير جدا الأم لازم تشتغل مع الطفل في البيت وتبدأ تفهم ان دورها اكبر واهم بكتير من دور المركز لان الطفل هيروح المركز ساعه او ساعتين لكن باقي اليوم قاعد ف البيت مع الاب والام فا دور الاسره او دور الام بحكم ان هي اللي بتشتغل مع الطفل ف اغلب الاحيان 70 % في حين ان دور المركز 30% فقط 

فا الأم لازم من اول يوم تبدأ تسأل ف كل حاجه تخص طفلها وتبدأ تشتغل معاه وتساعد في تأهيله وتطويره باستمرار علشان نقدر نحسن مستوي الطفل في وقت او في سن صغير 

ولازم الأخصائي اللي بيشتغل مع الطفل او المركز اللي الطفل بيروحه يبدأ يشرح للأم كل صغيرة وكبيرة تخص طفلها ويبدأ يطلعها علي البرنامج اللي الطفل هيشتغل عليه والأهداف والأنشطة اللي احنا شغالين عليه ويبدأ يعمل رنامج للأم في البيت ويتاعبع معاها ويكون في تواصل دائم بين الأم والأخصائي او الأخصائية الخاصة بالطفل.



Post a Comment

أحدث أقدم