لو طفلك عنده سنتين ولسه متكلمش …. اليك بعض النصائح والحلول


*** السلام عليكم ورحمة الله وبركاته ***

هنتكلم في موضوعنا عن أكتر الأسئلة الشائعة أو اكتر سؤال بيسأله الأباء والأمهات عن أطفالهم وعن عملية اكتساب اللغة او تطور اللغة لدي الأطفال

اول سؤال دايما بيتسئل ((( ابني عنده سنتين ولسه متكلمش ولا كلمة هل ده طبيعي ولا لاء ولو مش طبيعي ايه اللي ممكن أعمله او ازاي اقدر اساعد طفلي علي اكتساب اللغة وهل لازم اوديه مركز تخاطب او ابدأ معاه جلسات تخاطب ولا استني شويه وأوديه حضانه ولا لاء وهل لو اكتفيت ب اني اوديه حضانه هيتحسن ولا لاء  ؟  )))

- الاجابة الشائعة هي : 

ان لو طفلك طبيعي (طفل نورمال) معندوش مشاكل في السمع ( بيسمعك كويس / بينتبه لمصدر الصوت / بيسمع الاصوات المختلفة مش الأصوات العالية فقط ) لان في امهات كتير بتغلط ف الجزئية دي فاتبدأ تقول والله انا بلاحظ ان الولد بيسمع مفيش مشكله ف السمع وبعد كده نكتشف ان الطفل عنده مشكله ف السمع فا حابب اوضح ان السمع زي البصر يعني ممكن واحد يكون بيشوف بس نظه ضعيف نفس الفكرة بالنسبة للسمع ممكن الطفل يكون بيسمع بس في مشكله في ضعف سمع مثلا او مشكلة تانيه تعوق عملية السمع او تؤثر عليها

حاجه تانيه لازم نتأند منها وهي ان الطفل معندوش مشكلة في الإدراك والفهم !!  

*** طيب ازاي اقدر اعرف ده ؟ 

نقدر نتأكد من الجزئية دي من خلال تنفيذ الأوامر بمعني لما بتطلبي من طفلك يجيب اللعبه بتاعته هل بينفذ ولا لاء ؟ لما بتكلمي طفلك بتلاقي انه بيفهم وبيستوعب الكلام اللي بتقوليه ولا لاء ؟ لو طلبتي منه يروح يدور عالحذاء بتاعه هيفهم وهينفذ ولا لاء ؟ لو بتقوليله افتح التلاجه وهات ميه هيفهم وهينفذ ولا لاء ؟ لو بتقوليله عاوزين نطفي النور هيتصرف ازاي ؟ في أطفال هنلاقي انهم هيروحوا عند مفتاح الاضاءة وفي طفل تاني هلاي انه وقف فوق كرسي وبيحاول يطفي النور وفي طفل تالت هلاقي انه وقف فوق الكنبه وبيحاول يتصرف هنا اقدر اقول ان الولد بيفهمني ومدرك للامور من حوله .

*** ازاي اقدر أساعد طفلي في البيت ؟

وهنا الأم تقدر تبدأ تشتغل مع الطفل ده علي اكتساب اللغة وتقدر تبدأ ب انها تشتري ألعاب تنمية مهارات ( مجسمات فواكه وخضراوات وحيوانات - مكعبات / حلقات / باذلات ( باذل الفواكه / خضراوات / حيوانات / وسائل مواصلات / طيور / أشكال هندسية ) صندوق الخرز ... الخ ، وتبدأ مع الطفل شغل مستمر.

هتبدأ تلعب مع الطفل بالمجسمات لعب عادي خالص اهم حاجه عندنا أن الطفل يكون فاهم اننا بنلعب مش بنشتغل ومقعدينه نعذبه، وتبدأ تشتغل معاه علي مجسم مجسم من خلال تنفيذ الأوامر البسيطة ( خد - هات - امسك - ارمي ) فمثلا هتبدأ تشتغل معاه علي مجسم التفاحه فتبدأ تمسك المجسم وتقوله ( تفاااااااااحه) وتكرر الاسم اكتر من مره وبعدها تبدأ تقوله خد التفاحه فيبدأ الطفل يمد ايده ويمسك التفاحه ترجع تاني تقوله هات التفاحه فيبدأ يديها التفاحه ف ايدها وهكذا.

طيب لو الطفل مش فاهم الأوامر البسيطة بمعني ان الأم بتقوله خد التفاحه بتلاقي ان الطفل مش فاهم الأمر ( خد ) ولا عارف ينفذه هتعمل ايه ؟ 

هنا الأم هتبدأ تساعد الطفل يعني لما تقوله خد التفاحه هتبدأ تمسك ايده وتوجهها تجاه التفاحه وتساعده يمسكها وهكذا.

وبعد كده تبدأ تقوله هات التفاحه هتبدأ تمسك ايده وتوجهها ناحيتها وتاخد منه التفاحه وتساعده يديهالها وتكرر التدريب اكتر من مره لحد ما نلاقي ان الطفل بدأ يفهم الأوامر وينفذها وهكذا.

بعد كده ممكن نخلي الطفل يمسك التفاحه ونقوله يلا نرمي التفاحه ونبدأ نساعده انه يرمي التفاحه بعد كده نرجه للامر هات التفاحه ونخلي الطفل يجري يجيب التفاحه ويجي يديهالنا 

المهم ان نقوم بتكرار كل ده عدد كبير من المرات لحد ما اتأكد ان الطفل بقي قادر انه يتعرف علي التفاحه يعني لو حطيت التفاحه ف اي مكان وقولتله هات التفاحه يروح يجيبهالي او لو حطيت التفاحه بين مجسمين تانيين وسألته فين التفاحه او قولتله هات التفاحه يقدر يتعرف عليها ويمسكها ويديهالي ف ايدي بعد كده ابدأ اروح للمجسم التالي وابدأ ادربه علي الموزة مثلا اوا الكلب وابدأ انفذ نفس الخطوات اللي نفذناها في التدريب علي التفاحة وافضل اكرر واعيد كتير جدا علي الطفل لحد ما اوصل للنتيجة اللي انا عاوزها.

*** طيب ايه الأهداف اللي احنا هنحققها من خلال ما سبق ؟ 

 احنا هنا كده بنحقق اكتر من هدف

- الهدف الأول : اننا بنفذ الأوامر البسيطه ( خد - هات - ارمي - امسك ) 

- الهدف التاني : اننا بننمي اللغة الاستقبالية عنده الطفل وبنساعده يربط اسم الشيء بالمجسم بتاعه

- الهدف التالت : اننا بننمي قرة الطفل علي التعرف 

- الهدف الرابع : ان الطفل طول الوقت بيسمع الكلام المنطوق من الام 

ولازم اوضح اننا مش هنفضل نسأل نفسنا انا اشتغلت مع الطفل وهو برضو مقالش انا اشتغلت معاه اسبوع وبرضو مبينطقش اللي بيسمعه، احنا هنشتغل مع الطفل وهنبدأ ندخله الكلمات وهنبدأ نلاحظ  مع الوقت ان الطفل بدأ يعبر حتي لو ب أصوات او مقاطع بسيطة 

*** خطوة تانية لازم نشتغل عليها ***

 وهي تدريب الطفل علي التقليد 

هنبدأ بالتقليد الحركي ان انا مثلا هخبط علي المكتب واطلب من الطفل انه يخبط زيي 

ولو الطفل معررفش ابدأ امسك ايده واساعده انه يقلدني 

بعد كده ممكن اصفق والطفل يقلدني او ارفع ايدي لفوق والطفل يقلدني وهكذا.

بعد كده نشتغل علي التقليد الصوتي واكتر حاجه ممكن تجيب معانا نتايج كويسه هي التدريب علي تقليد أصوات الحيوانات 

هبدأ اجيب المجسمات والاعب الطفل بيها وانا بقلد أصواتها يعني مثلا لو بلعب مع الطفل ب الكلب فا هبدأ أقوله كلب كلب الكلب بيعمل ازاي الكلب بيعمل هوهوهو 

مثلا لو بلعب مع الطفل ب الخروف فا هبدأ أقوله خروف خروف الخروف بيعمل ازاي الخروف  بيعمل ماااااااااااااااااء ماااااااااااء مااااااااااااااااااااء .

ويبدأ الطفل يقلدني او يحاول يقلدني 

وممكن في الخطوة دي نستعين بفيديوهات للحيوانات وتقليد أصوات الحيوانات وابدأ اشغل الفيديو للطفل والطفل يسمع ويحاول يقلد الصوت الللي بيسمعه 

*** تقدروا تشتغلوا مع اطفالكم بالفيديو ده ***



*** ومن الخطوات المهمه جدا في التدريب او في الشغل مع الطفل *** 


هي اني اخلق عنده دافع للكلام او للنطق طيب ازاي اقدر اعمل ده ؟ 

أغلب الأمهات بنلاحظ انها اول ما الطفل يشاور علي الحاجه تجري تجبهاله او تبعت اخوه الكبير تقوله هاتله كذا هاتله اللعبه شوف اخوك عاوز ايه الخ الخ 

او امهات تانيه اول ماالطفل يبدأ يعيط تبدأ هي تعرف خدماتها عليه عاوز تاكل ؟ عاوز تشرب ؟ اجيبلك ميه ؟ عاوز تلعب ؟ اجيبلك اللعبه ؟ عاوز ايه وهكذا 

طول ماحنا بنفذ طلبات الطفل بالمشاورة الطفل ليه هيتكلم ؟ هو كل طلباته مجابه بالاشاره هيتعب نفسه ويتكلم ليه ؟ هيفضل يشاور فقط 

يبقي احنا اول خطوة نعملها اننا نوقف ده او نبطل ننفذ طلبات الطفل او نبطل نعمل الحاجه اللي هو بيشاور عليها  وهنا ممكن نبدأ نعمل نفسنا مش فاهمين هو عاوز ايه ونبدأ نديله اختيارات فمثلا لو انا عارف ومتأكد ان الطفل بيشاور علي الموزه مثلا اعمل نفسي مش فاهم وابدأ اسأله انت عاوز الموزه ولا التفاحه ؟ وافضل اكرر السؤال لحد ما يحاول يقول حتي لو مقطع بسيط يدل عالحاجه اللي هو عاوزها 

*** خطوة أخري ***

نقطة تانيه مهمه جدا اني امنع عن الطفل ده كل الشاشات ( موبايل / تابلت / ايباد / تلفزيون ) امنع كل ده مينفعش اسيب الطفل يتفرح علي اي حاجه او يستخدم الاجهزه دي 

طيب ليه انا همنع الشاشات ؟ لان ببساطه الطفل اللي قاعد ماسك الموبيل طول الوقت هو مش عايش معايا هو لا منتبه ولا مركز ولا حاسس باللي بيحصل هو كل تركيزه ف الموبيل وبس لكن مبيسمعش الكلام بين الاب و الام او الكلام بين الام و الاخوه الاكبر منه سنا ولا بيتفاعل معاها انا عاوز اخلي الطفل ده طول الوقت بيتفاعل وبيتواصل معايا ومع اخواته ومع كل المحيطين بيه علشان يبدأ ينتبه ويبدأ يحاول يكتسب اللغة والمهارات من كل المحيطين بيه ويبدأ يكتسب طرق جديده للتفاعل مع البيئة المحيطة بيه 

*** خطوة تانية مهمه جدا ***

 وهي ان الأم تتكلم مع الطفل كتير جدا لازم طول الوقت تكون بتتكلم مع الطفل وبتتفاعل معاه وهي بتأكله تتكلم معاه ييالا عشان تاكل يالا افتح بؤقك يالا كل البيضه يالا كل التفاحه وهكذا.

وهي بتلبسه هدومه يالا البس البنطلون يالا ارفع ايدك لفوق يالا دخل ايدك في التي شيرت التي شيرت لونه اصفر وهكذا.

حتي لو الأم مشغولة في ترتيب البيت او ف اي حاجه تكون بتتكلم مع الطفل او بتحكيله اللي هي بتعمله 

***  من الخطوات المهمه جدا هي خطوة القصص ***

لازم الام تبدأ تشتري قصص مصورة وتبدأ تحكيها للطفل وتبدأ تشتغل معاه كل يوم شويه هتبدأ تفتح القهة والطفل قاعد جنبها وتبدأ توصفلها الحاجات الموجوده في الصور ويكون الطفل منتبه ومركز معاها واحده واحده هيبدأ يقلدها ويبدأ يستجيب معاها

طيب لو الطفل ده حركي ومبيقعدش اصلا والام مش عارفة تسيطر عليه او تقعده جنبها عشان توصفله القصص ؟ 

هنا الأم ممكن تسيب الطفل يلعب ويخرج طاقتها وتيجي بالليل قبل ماالطفل ده ينام وتبدأ تشتغل معاه علي جزئية القصص هيكون الطفل خملان ومش هيتحرك كتير .

*** و من الخطوات الهامة جدا ***

خطوة ان الطفل ده يبدأ يروح الحضانة وهي خطوة مهمة جدا جدا وهنا احنا لما بننصح بالحضانة مبيكونش هدفنا ان الطفل يروح الحضانه يتعلم الحروف والأرقام زي ما اغلب الناس فاهمه، بالعكس احنا بنكون بننصح بالحضانة علشان الطفل يروح يتفاعل مع الأطفال او المعلمات  ويبدأ يجري ويلعب مع أصحابه ويبدأ يتفاعل ويتعود علي انه ياخد دور في لعبة معينه او يستني دوره يبدأ يتعامل معا الاطفال والمعلمات بتوعه وينفذ انشطة ويكتسب مهارات جديدة وكلمات جديدة

ممكن برضو نشترك للطفل ف نادي ويبدأ يروح النادي ويلعب مع الأطفال وهنا النادي هيكون بيحقق نفس الهدف اللي بننصح بيه دايما وهو وجود الطفل مع أطفال يبدأ يكتسب منه اللغة والمهارات ويبدأ يقلدهم ويحاول يتكلم او يقول الكلمات زيهم ويفضل ان الطفل يكون مع اطفال بيتكلموا افضل منه علشان يتعلم منه اللغة او يكتسب منه اللغة لو اشتغلنا علي كل النقاط دي هنلاحظ تحسن كبير باذن الله مع الطفل ف وقت قصير .





Post a Comment

أحدث أقدم